பொறியியல் மாணவர்களின் எதிர்காலம் கேள்விக்குறியாகியுள்ளது.

கடந்த பத்து ஆண்டுகளுக்கு முன்னால் பொறியியல் மாணவர்களுக்கு , குறிப்பாக , கணினிப் பொறியாளர்களுக்கு தனி மரியாதை இருந்தது . இத்துறையில் உலகம் முழுவதும் இந்தியர்கள் , குறிப்பாக , தென்னிந்தியர்கள் கோலோச்சியதால் கணினிப் படிப்புக்கு அதிக முக்கியத்துவம் தரப்பட்டது . இதனால் பெரும்பாலான அரசியல்வாதிகள் , தொழிலதிபர்கள் , பணக்காரர்கள் பலரும் அதிகம் பொறியியல் கல்லூரிகளைத் தொடங்கினர் . மாட்டுக் கொட்டகைகள் வகுப்பறைகளாக மாறின . விளைநிலங்கள் வானுயர்ந்த கான்கிரீட் கட்டடங்களாக உருமாறி நின்றன .
ஒவ்வோராண்டும் தேவை அதிகரித்ததால் மாணவர் சேர்க்கைக்கு விதித்திருந்த விதிமுறைகளில் கட்டுப்பாடுகளும் தளர்த்தப்பட்டன . பிளஸ் 2 – வில் தேர்ச்சி பெற்றால் போதும் பொறியாளராக முடியும் . ஆனால் பொறியியல் படிப்பில் 50 சதவீத மதிப்பெண்கள் பெற்றால்தான் தேர்ச்சி . இதனால் பொறியியல் படிப்பை ஆண்டுதோறும் நிறைவு செய்யும் சுமார் 15 லட்சம் மாணவர்களில் 80 சதவீதம் பேருக்கு வேலை கிடைக்கவில்லை , தரமில்லாத பொறியியல் கல்வியே அதற்குக் காரணம் . பல கல்லூரிகளில் அடிப்படை வசதிகளே இல்லை . பெரும்பாலான பொறியியல் கல்லூரிகளில் ஆசிரியர்கள் பற்றாக்குறை நிலவியது . இந்த ஆண்டு அண்ணா பல்கலைக்கழகம் வெளியிட்ட தேர்ச்சி அறிக்கையில் , இரு கல்லூரிகளில் ஒரு மாணவர்கூட தேர்ச்சி பெறவில்லை . இதனால் , மாணவர் சேர்க்கை குறைந்து போனதால் பல கல்லூரிகள் மூடப்பட்டன.தொடர்ந்து மூடப்பட்டும் கலைக்கல்லூரி களாக மாற்றப்பட்டும் வருகின்றன.

பள்ளிகளைப் பொருத்தவரையில் எழுதாமலே அனைத்து மாணவர்களும் தேர்ச்சி பெற்றதாக அறிவிக்கப்பட்டனர் . பொறியியல் கல்லூரிகளிலும் இறுதியாண்டு மாணவர்களைத் தவிர , பிற மாணவர்கள் தேர்வு எழுதாமலே தேர்ச்சி பெற்றதாக அறிவிக்கப்பட்டனர் . முதலில் , இறுதி பருவத் தேர்வு வைக்காமலேயே மாணவர்கள் தேர்ச்சி பெற்றதாக அறிவிக்கலாம் என அகில இந்திய தொழில்நுட்பக் கல்விக் குழுவும் ( ஏஐசிடிஇ ) . பல்கலைக்கழக மானியக் குழுவும் ( யுஜிசி ) தெரிவித்திருந்தன . ஆனால் , இப்போது அந்த நிலையில் மாற்றம் தெரிகிறது . இறுதிப் பருவத் தேர்வு வைக்காவிட்டால் அவர்களுக்கு மதிப்பிருக்காது . அதனால் கண்டிப்பாகத் தேர்வு நடத்தியே தீர வேண்டும் என்று அந்த அமைப்புகள் F தெரிவித்துள்ளன . இதனால் என்ன செய்வது என்கிற குழப்பத்தால் மாணவர்களின் மன அழுத்தம் அதிகரித்து வருகிறது . இறுதிப் பருவத் தேர்வு எழுதாதவர்களுக்குச் சான்றிதழ் வழங்க முடியாது எனவும் தெரிவித்துள்ளன . வழக்கமாக , மாணவர்களுக்கு இறுதிப் பருவத் தேர்வு ஏப்ரல் , மே மாதங்களில் தேர்வு முடித்து ஜூலை மாதத்துக்குள் தேர்ச்சி அறிவிக்கப்படும் . பல மாணவர்கள் வேலைக்கோ அல்லது உயர்கல்விக்கோ செல்வார்கள் . இதற்கு அவர்களுக்கு டிகிரி சான்றிதழ் அல்லது புரொவிஷனல் சான்றிதழ் தேவை . வெளிநாட்டுப் பல்கலைக்கழகங்களுக்கு இங்கிருந்து ஒவ்வொரு ஆண்டும் பல ஆயிரம் மாணவர்கள் செல்வார்கள்.தேர்வு எழுதாததால் அவர்கள் தங்கள் வாய்ப்புகளை இழந்து தவிக்கின்றனர்.

பொது முடக்கம் அறிவிக்கப்பட்ட பிறகு பலமுறை தேர்வுக்குத் தயாராகுங்கள் என்று மாணவர்களுக்கு அறிவிப்பு விடுக்கப்பட்டது . ஆனால் எப்போது தேர்வு என்பது குறித்து யாருமே தெளிவுபடுத்தவில்லை . இறுதிப் பருவத் தேர்வுகளை ஜூலை மாதத்துக்குள் முடிக்க வேண்டும் என்று அண்ணா பல்கலைக்கழகத் துணைவேந்தர் தெரிவித்திருந்தார் . இப்போது ஜூலை முடிந்து ஆகஸ்ட்டும் தொடங்கிவிட்டது . பொதுவாக பொறியியல் கல்லூரிகளில் படிக்கும் 2 , 3 – ஆவது ஆண்டு மாணவர்கள் , ” கோர் சப்ஜெக்ட் ‘ எனப்படும் முக்கியப் பாடங்களைப் படிப்பார்கள் . அவர்களுக்கு மொத்தம் ஆறு தேர்வுகள் . ஆனால் இம்முறை தேர்வு எழுதாமலே அவர்கள் தேர்ச்சி பெற்றதாக அறிவிக்கப்பட்டது . இறுதியாண்டில் இறுதிப் பருவ FINAL YEAR மாணவர்கள் பெரும்பாலும் விருப்பப் பாடத்தையே அதிகபட்சமாக மூன்று தேர்வாக எழுதுகின்றனர் . சில கல்லூரிகளில் இறுதியாண்டில் படிப்போருக்கு , தேர்வே நடத்தப்படுவதில்லை . முன்கூட்டியே அனைத்துத் தேர்வுகளையும் எழுதியதால் புராஜக்ட் மட்டுமே மிச்சம் இருக்கிறது. தமிழகத்தைப் பொருத்தவரையில் , அண்ணா பல்கலைக்கழகத்தின் கீழுள்ள கல்லூரிகளுக்கு மட்டும் இந்தப் பிரச்னை . பல தன்னாட்சிக் கல்லூரிகள் தேர்வு முடிவுகளை அறிவித்து விட்டன . பல நிகர்நிலைப் பல்கலைக் கழகங்கள் ஆன்லைன் தேர்வின் மூலம் தங்கள் இறுதிப் பருவ மாணவர்களின் திறனைச் சோதித்து தேர்வு முடிவுகளை அறிவித்து விட்டன.

முக்கியமான பாடங்களை எழுதுவோருக்குத் தேர்வு ரத்து . ஆனால் விருப்பப் பாடங்களை மட்டும் எழுதுவோருக்கும் புராஜக்ட் மட்டும் உள்ளோருக்கும் கண்டிப்பாகத் தேர்வு நடத்தியே ஆக வேண்டும் . இறுதியாண்டு மாணவர்களுக்கு , நாளை ஒரு போட்டி என வரும்போது தேர்வு எழுதியிருந்தால் தான் மதிப்பு  என்பதால் தேர்வு வைக்க வேண்டும் என்று கல்வித்துறையினர் சொல்கின்றனர் . செப்டம்பர் மாதத்தில் வெளிநாடுகளில் மாணவர் சேர்க்கை முடிந்து வகுப்புகளே தொடங்கிவிடும் . ஆன்லைன் தேர்வுக்கு அண்ணா பல்கலைக் கழகம் வரும் 13 – ஆம் தேதிக்குள் ஒப்பந்தப்புள்ளி கோரியுள்ளது . ஒப்பந்தம் இறுதி செய்யப்பட்டு நடைமுறைக்கு எப்போது வரும் என்பது யாருக்குமே தெரியாது . பொது முடக்கத்தின்போது அவரவர் வீட்டில் இருந்தபோது தேர்வுக் கட்டணத்தைச் செலுத்த வேண்டும் என்று தெரிவிக்கப்பட்டது . அதனால் மாணவர்கள் அப்போதே தேர்வுக் கட்டணத்தைச் செலுத்தினர் . அவர்கள் எப்போது தேர்வு நடைபெறும் என்று தொடர்ந்து எதிர்பார்த்துக் கொண்டே இருப்பதால் எதிர்காலம் கேள்விக்குறியாகியுள்ளது .