அமைச்சரவையில் ஸ்டாலின் புறக்கணித்த மாவட்டங்களும் காரணமும்!

திமுக அமைச்சரவை பட்டியலில் சில மாவட்டங்கள் புறக்கணிக்கப்பட்டுள்ளது விவாதத்தை ஏற்படுத்தியுள்ளதுசலசலப்புகள் திமுக தலைவர் ஸ்டாலின் காதுகளுக்கும் கொண்டு செல்லப்படுள்ளதுஅதிகாரம் குறிப்பிட்ட பகுதியிலேயே குவிந்து கிடப்பது சரியானதாக இருக்காது திருவாரூர் தொகுதியில் தொடர்ந்து 7ஆவது முறையாக திமுக வெற்றி பெற்றுள்ளது

திமுக தலைவர் ஸ்டாலின் முதல்வராக நாளை பொறுப்பேற்கவுள்ளார். பெரிதும் எதிர்பார்க்கப்பட்ட திமுக அமைச்சரவை பட்டியல் இன்று வெளியாகியுள்ளது. பட்டியல் வெளியாவதற்கு முன்பே, அனைத்து சமூகங்களையும் பிரதிநித்துவப் படுத்தும் வகையில் அமைச்சரவை இருக்கும். குறிப்பிட்ட, முக்கியமான சில துறைகள் இளைஞர்கள் வசம், புதிய முகங்களிடம் ஒப்படைக்கப்படும் என்ற தகவல் வெளியானது. அதற்கு ஏற்றவகையிலே, பெரும்பாலும் அனைத்து சமூகத்தை, பிரிவினரை சேர்ந்தவர்களும் அமைச்சரவை பட்டியலில் இடம் பெற்றுள்ளனர்.

பொதுவாக இதுபோன்ற ஒரு பட்டியல் வெளியாகும் போது, அனைத்து மாவட்டங்களையும், சமூகத்தினரையும், பிரிவினரையும் பிரதிநிதித்துவப்படுத்த வேண்டும் என்பது எதிர்பார்ப்பாக இருக்கும். ஆனால், சில சாதக, பாதக அம்சங்கள் இருப்பது வழக்கமே. அந்த வகையில், ஸ்டாலின் அமைச்சரவைப் பட்டியலில் சேலம், நெல்லை, தென்காசி, தேனி, கிருஷ்ணகிரி உள்ளிட்ட 14 மாவட்டங்களில் இருந்து யாரும் அமைச்சரவையில் இடம்பெறவில்லை.

குறிப்பாக, திமுகவுக்கு அதிக தொகுதிகளில் வெற்றி வாய்ப்பை ஏற்படுத்தித்தந்த தஞ்சாவூர், திருவாரூர், நாகப்பட்டினம் மாவட்டங்களை உள்ளடக்கிய டெல்டா மாவட்டத்தில் இருந்து யாருக்கும் அமைச்சர் பதவி கொடுக்கப்படவில்லை. எடப்பாடி பழனிசாமி தன்னை ஒரு விவசாயியாக காட்டிக் கொண்டது விவசாயிகள் அல்லாதவர்கள் மத்தியில் எடுபட்டதே தவிர, விவசாயிகள் மத்தியில் எடுபடவில்லை. இதற்கு உதாரணமாக இருப்பது டெல்டா மாவட்டம். டெல்டாவில் ஒரத்தநாடு, நன்னிலம் தொகுதிகளை தவிர மற்ற அனைத்து தொகுதிகளிலும் திமுக வெற்றி பெற்றது.

திருவாரூர் தொகுதியில் தொடர்ந்து 7ஆவது முறையாக திமுக வெற்றி பெற்றுள்ளது. ஒரு முறை கூட இங்கு அதிமுக வென்றது இல்லை. மன்னார்குடியில் தொடர்ந்து 3ஆவது முறையாக திமுக வெற்றி பெற்றுள்ளது. ஆனாலும் பூண்டி கலைவாணனுக்கோ, டி.ஆர்.பி.ராஜவுக்கோ அமைச்சர் பதவி தரப்படவில்லை. இதனால், டெல்டாவை திமுக புறக்கணித்து விட்டதாக பேசப்படுகிறது.

ஆனால், டெல்டாவின் அண்டை மாவட்டமும், மத்திய மாவட்டமுமான திருச்சிக்கு கே.என்.நேரு, அன்பில் மகேஷ் ஆகிய இரண்டு அமைச்சர்கள் கிடைத்துள்ளனர். இவர்களில் நேரு ஸ்டாலினுக்கும், அன்பில் மகேஷ் உதயநிதிக்கும் நெருக்கமானவர்கள் என்பதால் இருவரையும் புறக்கணிக்க முடியாத சூழல் ஏற்பட்டுள்ளது என்கிறார்கள் மேலிடத்துக்கு நெருக்கமான உடன்பிறப்புகள். இதுபோன்ற காரணங்களால் டெல்டாவுக்கான அமைச்சர்கள் கிடைக்காமல் போயிருக்கலாம்.

அதேபோல், தூத்துக்குடி மாவட்டத்தில் இரண்டு அமைச்சர்கள் உள்ளனர். அனிதா ராதாகிருஷ்ணன், கீதா ஜீவன் ஆகிய இருவரும் ஒரே சமுதாயத்தை சேர்ந்தவர்களாக இருப்பினும், இருவரும் பலமானவர்கள் என்பதால் அமைச்சர் பதவி கொடுக்கப்பட்டுள்ளதாம். நெல்லை, தென்காசியை பொறுத்தவரை பூங்கோதை ஆலடி அருணா, ஆவுடையப்பன் ஆகியோர் வெற்றி பெற்றிருந்தால் அவர்களுக்கு அமைச்சர் பதவி சென்றிருக்க வாய்ப்புள்ளது. நெல்லையின் பாளையங்கோட்டையில் நின்று வெற்றி பெற்ற அப்துல் வஹாப் இஸ்லாமியர். ஆனால், ஆவடியில் அமைச்சரை எதிர்த்து வெற்றி பெற்ற நாசர், செஞ்சி மஸ்தான் ஆகிய இரு இஸ்லாமியர்களுக்கு அமைச்சரவையில் இடம் கொடுக்கப்பட்டதால் வஹாபிற்கு வாய்ப்பளிக்கவில்லை என்கிறார்கள்.

அதேபோல், திண்டுக்கல், விருதுநகர் போன்ற மாவட்டங்களுக்கும் 2 அமைச்சர்கள் கொடுக்கப்பட்டுள்ளது. சென்னையில் ஸ்டாலின் தவிர 2 பேருக்கு அமைச்சர் பதவி தரப்பட்டுள்ளது. தேனியை பொறுத்தவரை போடி தொகுதியை தவிர மற்ற தொகுதிகளில் திமுக வெற்றி பெற்றுள்ளது. ஆனால், அந்த மாவட்டத்துக்கு அமைச்சர் இல்லை. அதேசமயம், மதுரைக்கு இரண்டு அமைச்சர்கள் உள்ளனர். பெரும்பாலான மாவட்டங்களில் வெற்றி பெற்றவர்கள் அமைச்சர் பதவிக்கு ஏதுவானவர்களாக இல்லாத பட்சத்தில் அவர்களுக்கு வாய்ப்பளிக்கப் படவில்லையாம்.

இருப்பினும், அண்டை மாவட்டத்தில் இருக்கும் அமைச்சர்களை கொண்டு அதன் சுற்றுவட்டாரப் பகுதிகள் கணக்கில் கொள்ளப்பட்டு அமைச்சரவை பட்டியல் தயார் செய்யப்பட்டுள்ளதாக கூறப்படுகிறது. ஆனால், அதிகாரம் குறிப்பிட்ட பகுதியிலேயே குவிந்து கிடப்பது சரியானதாக இருக்காது என்ற கருத்தை அரசியல் விமர்சகர்கள் முன்வைத்துள்ளனர்.

அமைச்சரவை பட்டியல் வெளியான பின்னர் ஏற்பட்டு வரும் சலசலப்புகள் திமுக தலைவர் ஸ்டாலின் காதுகளுக்கும் கொண்டு செல்லப்படுள்ளன. எனவே, அதற்கு ஏற்றவாறு நெகிழ்வுத்தன்மையை விரைவில் அவர் கடைப்பிடிப்பார் என்கிறார்கள் அவருக்கு நெருக்கமானவர்கள். அதேசமயம், கலைஞர் ஆட்சி போன்று இதே அமைச்சர்களே அடுத்த 5 ஆண்டுகளுக்கும் தொடர்வார்கள் என்பது கிடையாது. அமைச்சரவையில் அவ்வப்போது மாற்றம் கொண்டு வரப்படும் என்றும் கூறப்படுகிறது. அந்த சமயத்தில் வாய்ப்பளிக்கப்படாதவர்களுக்கு வாய்ப்பளிக்கப்படும் என்ற தகவலும் வெளியாகியுள்ளது.

Related posts:

தேர்தலில் யார் வெற்றிக்கு வேலை செய்தார் சுனில்?- அதிமுகவில் வெடிக்கப் போகும் பூகம்பம் ?
"தர்மத்தின் வாழ்வுதனை சூது கவ்வும்: தர்மம் மறுபடியும் வெல்லும்" !
கொங்கு மண்டலத்தின் வெற்றி கவுண்டர்களின் வர்க்க அரசியலின் வெற்றி!
எடப்பாடிக்கு ஓகே சொன்ன பாஜக !!
ஓ.பி.எஸ்ஸை எதிர்ப்பையும் மீறி எதிர்க்கட்சித் தலைவரான ஈ.பி.எஸ்! மீண்டும் தர்மயுத்தம் தொடங்குவாரா ஓ.பி.எஸ் ?
வேலுமணியை தொடர்ந்து கே.சி.வீரமணி..அறப்போர் இயக்கம் வழங்கிய லிஸ்ட்..
மேற்கு வங்கத்தில் ஜனாதிபதி ஆட்சி ? தேர்தல் நடக்குமா ?
மக்கள் நீதி மய்யத்தின் துணைத்தலைவர் மகேந்திரன் விலகியிருப்பதற்கு, தி.மு.க.,வின் நிர்ப்பந்தம்தான் காரணமென்ற தகவல் வெளியாகியுள்ளது.