சசிகலா என்ட்ரிக்கு ஓகே சொன்ன டெல்லி! இணைப்புக்கு தேதி குறிச்சாச்சா?

எடப்பாடி பழனிசாமி தரப்பு சசிகலா கட்சிக்குள் வருவதற்கு கொஞ்சமும் வாய்ப்பளித்துவிடாது என்று தீவிரமாக இயங்கிக் கொண்டிருக்கிறது. சசிகலாவை காட்டி கட்சிக்குள் தனக்கான வலுவான இடத்தை தக்கவைத்து வருகிறார் ஓ.பன்னீர் செல்வம். இருப்பினும் சசிகலாவோ அதிமுகவை கைப்பற்றியே தீருவேன் என பல நடவடிக்கைகளை மேற்கொண்டு வருகிறார். அவரது தொடர் முயற்சிக்கு பலன் கிடைத்துவிட்டதாக கூறுகிறார்கள் அவருக்கு நெருக்கமானவர்கள்.

மதுரைக்கு சுற்றுப் பயணம் மேற்கொண்டு தொண்டர் கூட்டம் தன் பின்னால் இருக்கிறது என்று சசிகலா ஒரு சேதி சொன்னார். ஆனால் அதிமுக தலைமைக் கழக நிர்வாகிகளோ, டெல்லி மேலிடமோ சசிகலாவுக்கு சாதகமாக இல்லை. சசிகலாவுக்கு சாதகமாக பேசுபவர்கள் கட்சியிலிருந்து கட்டம் கட்டி தூக்கப்படுகின்றனர்.

ரஜினி மூலம் டெல்லியை எட்டிய சசிகலா: ஓபிஎஸ், இபிஎஸ் கப்சிப்!
ஆனால் ரஜினிகாந்துடனான சந்திப்புக்குப் பிறகு சசிகலாவுக்கு சாதகமாக சூழல் மாறி வருவதை அரசியல் வானிலை ஆய்வாளர்கள் கணித்துள்ளனர். அதுமட்டுமல்லாமல் அதிமுக அலுவலகத்திலுருந்தும் டெல்லியிலிருந்தும் வரும் தகவல்கள் அதை உறுதிபடுத்துகின்றன. வெளிப்படையாக நடைபெற்ற இரு சம்பவங்களை இதற்கு உதாரணமாக சொல்லலாம்.

மாற்றத்தை ஏற்படுத்திய சந்திப்பு!

அண்மையில் சசிகலா நடிகர் ரஜினிகாந்தை சந்தித்துப் பேசினார். அதுகுறித்து நமது சமயம் தமிழில் பதிவு செய்திருந்தோம். “எனக்காக டெல்லியிடம் பேசுங்கள், பிரிந்து நிற்கும் அதிமுகவை இணைத்தால் மக்களவைத் தேர்தலில் கணிசமான இடங்களில் வெற்றியை பெற்றுக் கொடுக்க வேண்டியது எனது பொறுப்பு” என சசிகலா கூறியதாக சொல்கிறார்கள் விவரம் அறிந்தவர்கள். ஆனால் இதற்கு ரஜினிகாந்த் பிடி கொடுக்க வில்லையாம். லதா ரஜினிகாந்த் தான் சசிகலாவுக்கு நம்பிக்கை வார்த்தை சொல்லி அனுப்பியுள்ளாராம்.

ரஜினிகாந்த் தனக்காக பரிந்து பேசாவிட்டாலும், எப்படியும் டெல்லி தரப்பு அவரை தொடர்பு கொண்டு சசிகலா என்ன சொன்னார் என கேட்கும். அப்போது தான் சொன்னதை மட்டும் அவர்களிடம் ரஜினி சொன்னால் போதும் என கணக்கு போட்டுள்ளார் சசிகலா. அவர் எதிர்பார்த்தது போல் டெல்லிக்கு இந்த விவரங்கள் எட்டிவிட்டன. எனவே டெல்லி இதில் என்ன முடிவெடுக்கிறது என்பது அடுத்தடுத்த நகர்வுகளில் தெரிந்துவிடும் என்கிறார்கள்.” என பதிவு செய்திருந்தோம்.

ராஜேந்திர பாலாஜி கேரளாவில் பதுங்கினாரா? தேடுதல் வேட்டையில் போலீஸார்!
இதன் தொடர்ச்சியாக பாஜக தலைவர் அண்ணாமலை ரஜினிகாந்தை அவரது இல்லத்தில் சந்தித்துப் பேசியுள்ளார். சசிகலா சொல்லி டெல்லிக்கு தெரியப்படுத்திய தகவலை அண்ணாமலையிடமும் ரஜினிகாந்த் பேசியுள்ளாராம். இந்த சந்திப்புக்குப் பின்னர் அண்ணாமலையின் பேட்டி ஒன்று டைம்ஸ் ஆஃப் இந்தியா நாளிதழில் நேற்று வெளியானது. அதில்,

அண்ணமலையிடம் முன்வைக்கப்பட்ட இரு முக்கியமான கேள்விகளும் அவரது பதில்களும்!

கேள்வி:அதிமுகவுக்குள் பன்னீர்செல்வத்துக்கும் எடப்பாடிபழனிசாமிக்கும் இடையே நிலவும் விரிசல்களை சரி செய்ய பாஜக நட்பு ரீதியாக முயற்சி செய்திருக்கிறதா?

பதில்:ஜெயலலிதா அவர்களின் மரணத்திற்குப் பிறகு அதிமுக தொடர்ந்து உறுதியாக இருக்க வேண்டும் என்பதையே பாஜக விரும்புகிறது. அதற்காக பாஜக பல்வேறு வகைகளிலும் செயல்பட்டது‌. எங்கள் கட்சியின் தேசிய செயலாளர்கள் தமிழ்நாட்டுக்குப் பொறுப்பு வகிக்கும் பொதுச்செயலாளர்கள் மூலமாக இதற்கான முயற்சிகள் நடைபெற்றிருக்கின்றன. பாஜகவை உறுதியாக ஆதரிக்கும் அதிமுக வலிமையாக இருக்க வேண்டும் என்பதே பாஜகவின் விருப்பம்.

கேள்வி: எதிர்கால அதிமுகவில் சசிகலாவின் பங்கு எப்படி இருக்கும் என்று நினைக்கிறீர்கள்?

பதில்: ஒன்று மட்டும் உறுதியாகச் சொல்கிறேன். தமிழக அரசியலில் யாரையும் வலுக்கட்டாயமாக ஒதுக்கிவிட முடியாது. யாரும் எப்போதும் மீண்டு வரலாம். பெரும்பாலான கட்சிகள் தொண்டர்களாலேயே இயக்கப்படுகின்றன. தொண்டர்கள் இவர்தான் நம் தலைவர் என்று முடிவு செய்துவிட்டால் யாரும் தடுக்க முடியாது. சசிகலாவின் பிளஸ், மைனஸ் குறித்து தனிப்பட்ட கருத்துகளை கூற விரும்பவில்லை, ஆனால், மாநிலத்தின் முன்னேற்றத்திற்காக, நல்ல தலைவர்கள் அனைவரும் ஒன்றிணைந்து, அதிமுக வலுவாக இருக்க வேண்டும் என்பதில் உறுதியாக இருக்கிறேன்.

அண்ணாமலையின் இந்த பேட்டி அதிமுகவுக்குள் அனலைக் கிளப்பி வருகிறது. அண்ணாமலையின் பேச்சு முழுக்க முழுக்க டெல்லியின் குரலே. இந்த டெல்லியின் குரல் அதிமுகவுக்குள்ளும் நேற்றே ஒலிக்கத் தொடங்கிவிட்டது.

மீண்டும் சசிகலா பக்கம் சாயும் ஓபிஎஸ்?

அதிமுக சார்பில் நேற்று சென்னையில் நடைபெற்ற கிறிஸ்துமஸ் விழாவில் ஓபிஎஸ், இபிஎஸ் உள்ளிட்ட பல்வேறு நிர்வாகிகளும் பங்கேற்றனர்.

விழாவில் நிறைவுரையாற்றிய ஓ.பன்னீர் செல்வம், ”நான் நல்லவர்களை காக்க பூமிக்கு வரவில்லை. பாவத்தை சுமந்து கொண்டிருப்பவர்களை மனம் திருந்தச் செய்யவே, நான் வந்திருக்கிறேன் என்று இயேசு கிறிஸ்து சொல்லியிருக்கிறார். நல்லவர்கள் என்றுமே நல்லவர்களாக இருப்பார்கள். ஆனால் தவறு செய்தவர்கள் திருந்தி வந்தால் அவர்களை ஏற்பதே நல்ல தலைமைக்கு ஏற்புடையது என்று இயேசு பிரான் கூறியுள்ளார்” என்று குறிப்பிட்டார்.

இது குறித்து அதிமுக மேல்மட்ட நிர்வாகிகள் வட்டாரத்தில் பேசினோம். “திருந்தி வந்தால் ஏற்பதே தலைமைக்கு ஏற்புடையது என்று சசிகலா விவகாரத்தையே ஓபிஎஸ் மீண்டும் கையிலெடுத்துள்ளார். உட்கட்சித் தேர்தலுக்கு முன்னர் சசிகலா ஆதரவு நிலைப்பாட்டை லேசாக காட்டி தனக்கு முக்கியத்துவம் வேண்டும் என சொல்லாமல் சொன்னார் ஓபிஎஸ். செயற்குழு கூட்டம், ஒருங்கிணைப்பாளர்கள் தேர்தல் சமயத்தில் அமைதி காத்து தனது பதவியை உறுதி செய்தார். தற்போது மீண்டும் சசிகலாவை காட்டி எடப்பாடி பழனிசாமிக்கு நெருக்கடி கொடுக்க ஆரம்பித்துவிட்டார். ஓபிஎஸ் எப்போதும் தனக்கு பின்னால் ஒரு பேக்கப் இல்லாமல் எதையும் பேசமாட்டார். எந்த முடிவையும் எடுத்துவிட மாட்டார். தற்போது சசிகலாவுக்கு ஆதரவாக அவர் பேசியிருப்பற்கு காரணம் டெல்லியிலிருந்து வந்த சமிக்ஞையே” என அடித்துச் சொல்கிறார்கள்.