கடத்தல், சுங்கத்துறை விசாரணை, லஞ்சம், துரோகம் எனப் பல்வேறு அம்சங்களை மையமாகக் கொண்டு உருவாகியுள்ள திரைப்படம் எனிமி ஆஃப் த ஸ்மக்ளர். முன்னாள் இந்திய வருவாய்ப் பணித் துறை (IRS) அதிகாரியான இயக்குநர் டி. சமயா முரளி, தனக்குக் கிடைத்த தொழில்முறை அனுபவத்தைத் திரைக்கதையில் பயன்படுத்தியிருப்பது படத்தின் மிகப்பெரிய பலமாக அமைந்துள்ளது.சரண் சக்தியும் பால சரவணனும் கப்பல் போக்குவரத்துத் துறையில் பணிபுரியும் நெருங்கிய நண்பர்கள். இவர்களில் பால சரவணன் சுங்கத்துறை அலுவலகப் பணியிலும் தொடர்புடையவராக இருக்கிறார். இவர்களது வாழ்க்கையில் மிகப்பெரிய கடத்தல் கும்பலைச் சேர்ந்த ஜே.டி. சக்கரவர்த்தி நுழைகிறார்.
குடும்பக் கடனை அடைக்க வேண்டும் என்ற சூழ்நிலையில், ஜே.டி. சக்கரவர்த்தியுடன் இணைந்து சட்டவிரோதமான முறையில் சரக்குகளைக் கையாளும் வேலையில் சரண் சக்தி ஈடுபடுகிறார். இதற்கு நண்பரான பால சரவணனும் உறுதுணையாக இருக்கிறார்.
ஒரு கட்டத்தில் இவர்களது நடவடிக்கைகள் சுங்கத்துறை அதிகாரிகளின் கவனத்திற்கு வருகின்றன. விசாரணை தீவிரமடையும்போது, இதன் பின்னணியில் மிகப்பெரிய முறைகேடு நடந்திருப்பது தெரியவருகிறது. அந்தக் கடத்தல் வலையின் பின்னணியில் என்ன இருக்கிறது? அதில் சிக்கிக்கொள்ளும் நண்பர்கள் சந்திக்கும் பிரச்சினைகள் என்ன? என்பதற்கான விடைகளைப் படத்தின் மீதிக்கதை சொல்கிறது.
ஒரு குற்றப் பின்னணித் திரைப்படத்திற்கு நம்பகத்தன்மையும் விறுவிறுப்பும் மிகவும் அவசியம். அந்த வகையில், இயக்குநர் டி. சமயா முரளி தனது அனுபவத்தைத் திரைக்கதையில் அழகாகப் பயன்படுத்தியிருக்கிறார்.
சுங்கத்துறை விசாரணைகள், சரக்குப் பரிமாற்றத்தில் நடைபெறும் முறைகேடுகள், கடத்தல் கும்பல்களின் செயல்பாடுகள் என ஒவ்வொரு அம்சத்தையும் கவனமாகக் கையாண்டிருப்பது பாராட்டுக்குரியது. காட்சிகள் வெறுமனே சினிமாத்தனமாக இல்லாமல், நிஜத்தில் இத்தகைய சம்பவங்கள் எப்படியெல்லாம் நடைபெறக்கூடும் என்ற எண்ணத்தை ஏற்படுத்தும் வகையில் அமைந்துள்ளன.
குறிப்பாக, கதையின் பின்னணியைப் பார்வையாளர்களுக்கு நம்பும்படியாக எடுத்துச் செல்ல இயக்குநர் மேற்கொண்டுள்ள முயற்சி சிறப்பானது. சுங்கத்துறை சார்ந்த நுணுக்கங்களைத் தெரிந்த ஒருவர் படத்தை இயக்கியிருப்பது திரைக்கதையில் தெளிவாகத் த
சரண் சக்தி கதையின் மையக் கதாபாத்திரத்தில் சிறப்பான நடிப்பை வழங்கியிருக்கிறார். சூழ்நிலைகளால் தவறான பாதையில் செல்லும் ஒரு மனிதனின் மனநிலையையும், அதன் விளைவுகளையும் தனது நடிப்பில் வெளிப்படுத்தியிருக்கிறார்.
பால சரவணன் தனது வழக்கமான நகைச்சுவைப் பாணியைத் தாண்டி, கதையின் ஓட்டத்திற்கு முக்கியத்துவம் அளிக்கும் வகையில் நடித்திருக்கிறார். சரண் சக்தியுடனான நட்பும், கதையில் அவர் வகிக்கும் பங்கும் படத்திற்கு வலு சேர்க்கின்றன.
ஜே.டி. சக்கரவர்த்தி, லால், ராதிகா சரத்குமார் போன்ற அனுபவம் வாய்ந்த நடிகர்களின் பங்களிப்பு படத்திற்கு கூடுதல் பலமாக அமைந்துள்ளது. தங்களுக்குக் கொடுக்கப்பட்ட கதாபாத்திரங்களில் அவர்கள் அனுபவத்துடன் நடித்திருப்பது குறிப்பிடத்தக்கது.மேலும், கதாநாயகியாக நடித்துள்ள ஹரிமுகவும் தனது நடிப்பால் கவனம் ஈர்க்கிறார். இளம் வயதிலும் கதாபாத்திரத்திற்கு ஏற்ற உணர்வுகளை வெளிப்படுத்தி, படத்தின் முக்கியமான பலமாகத் திகழ்கிறார்.
சாம் டேனியலின் இசையும் பின்னணி இசையும் படத்தின் குற்றப் பின்னணிக்கு ஏற்ற வகையில் அமைந்துள்ளன. விசாரணைகள் மற்றும் பதற்றம் நிறைந்த காட்சிகளுக்கு இசை துணையாக இருக்கிறது.ஒளிப்பதிவும் கதையின் தன்மைக்கு ஏற்றவாறு அமைந்துள்ளது. காட்சிகளின் யதார்த்தத்தையும், கதைக்களத்தின் தீவிரத்தையும் வெளிப்படுத்தும் விதத்தில் தொழில்நுட்பக் கலைஞர்கள் தங்களது பங்களிப்பைச் சிறப்பாக வழங்கியுள்ளனர்.
படம் முழுவதும் சுவாரஸ்யமாக நகரும் திரைக்கதை, இறுதிக்கட்டத்தில் மட்டும் சற்றே தடுமாறுகிறது. விறுவிறுப்பாகக் கட்டமைக்கப்பட்ட கதைக்கு இன்னும் வலுவான கிளைமாக்ஸ் அமைந்திருந்தால், படத்தின் தாக்கம் அதிகரித்திருக்கும். இந்தச் சிறிய குறை படத்தின் ஒட்டுமொத்த அனுபவத்தில் சற்றே தொய்வை ஏற்படுத்துகிறது.
இருப்பினும், வித்தியாசமான கதைக்களம், நம்பகத்தன்மை கொண்ட திரைக்கதை, நடிகர்களின் சிறப்பான பங்களிப்பு ஆகியவை அந்தக் குறையை ஓரளவுக்குச் சரிசெய்கின்றன.எனிமி ஆஃப் த ஸ்மக்ளர் திரைப்படம் கடத்தல் மற்றும் சுங்கத்துறை விசாரணைகளை மையமாகக் கொண்டு உருவாகியுள்ள கவனிக்கத்தக்க படைப்பு. இயக்குநரின் துறை சார்ந்த அனுபவம், திரைக்கதையின் யதார்த்தம், நடிகர்களின் இயல்பான நடிப்பு ஆகியவை படத்தை ரசிக்க வைக்கின்றன.