மூன்று மாதங்களில் இந்தியாவில் 4.9 கோடி ஸ்மார்ட்போன்கள் விற்பனை !

க்ஷியோமி நிறுவனத்தின் சந்தைப் பங்கு 26 சதவீதமாக உயர்ந்துள்ளது.பீச்சர் போன்களின் விற்பனை 37 சதவீதம் சரிவைச் சந்தித்துள்ளது.ஜூலை – செப்டம்பர் காலாண்டில் இந்தியாவில் ஸ்மார்ட்போன் விற்பனை 10 சதவீதம் வளர்ச்சி கண்டுள்ளது.

ஸ்மார்ட்போன் இல்லாத ஆளே இல்லை என்ற அளவுக்கு நம் மக்களிடையே ஸ்மார்ட்போன்களின் பயன்பாடு நாளுக்கு நாள் அதிகரித்து வருகிறது. பல்வேறு சிறப்புச் சலுகைகளுடன் குறைந்த விலைக்கு விற்பனை செய்து ஸ்மார்ட்போன் நிறுவனங்கள் தங்களது விற்பனையை இந்தியாவில் தொடர்ந்து அதிகரித்து வருகின்றன.இந்தியாவில் மிக வேகமாக வளரும் ஸ்மார்ட்போன் சந்தையில் சீனா உள்ளிட்ட நாடுகளைச் சேர்ந்த நிறுவனங்கள் பல தங்களது தயாரிப்புகளை அறிமுகப்படுத்தி வாடிக்கையாளர்களை ஈர்த்து வருகின்றன. இதனால் உள்நாட்டு நிறுவனங்களுக்கும் சாம்சங், ஆப்பிள் உள்ளிட்ட பிரபல நிறுவனங்களுக்கும் கடும் போட்டி ஏற்பட்டுள்ளது.

ஸ்மார்ட்போன் விற்பனை குறித்த விவரங்களை கவுண்ட்டர் பாயிண்ட் ஆய்வு நிறுவனம் தற்போது வெளியிட்டுள்ளது. அதன்படி, ஜூலை – செப்டம்பர் காலாண்டில் மொத்தம் 4.9 கோடி ஸ்மார்ட்போன்கள் இந்தியாவில் விற்பனை செய்யப்பட்டுள்ளன. இது 2018ஆம் ஆண்டின் விற்பனை எண்ணிக்கையை விட 10 சதவீதம் கூடுதலாகும்.ஸ்மார்ட்போன் விற்பனையில் சீனாவைச் சேர்ந்த க்ஷியோமி நிறுவனம் முன்னிலை வகிக்கிறது. அதன் சந்தைப் பங்கு தற்போது 26 சதவீதமாக உயர்ந்துள்ளது. க்ஷியோமியின் வளர்ச்சியால் சாம்சங் நிறுவனத்தின் சந்தைப் பங்கு 20 சதவீதமாகக் குறைந்துள்ளது.

விவோ நிறுவனம் 17 சதவீதமும், ரியல்மீ நிறுவனம் 16 சதவீதமும், ஒப்போ நிறுவனம் 8 சதவீதமும் சந்தைப் பங்கை கொண்டுள்ளன. அமெரிக்காவின் ஆப்பிள் நிறுவனம் தனது ஐபோன்களின் விலையைக் குறைத்து விற்பனை செய்ததால் அதிகம் விற்பனையான ஸ்மாட்போன்களுக்கான பட்டியலில் முதல் பத்து இடங்களுக்குள் முன்னேறியுள்ளது.அதிக விலை கொண்ட பிரீமியம் ஸ்மார்ட்போன்களுக்கான பட்டியலில் ஒன் பிளஸ் முதலிடத்தைப் பிடித்துள்ளது. ஸ்மார்ட்போன்கள் விற்பனை அதிகரித்துள்ள நிலையில் மறுபுறம் சாதாரண ரக பீச்சர் போன்களின் விற்பனை 37 சதவீதம் சரிவைச் சந்தித்துள்ளது.