Sunday, April 14

சிக்கும் மாஜிக்கள்: ஸ்டாலினிடம் போன ஃபைல்

சிக்கும் மாஜிக்கள்: ஸ்டாலினிடம் போன ஃபைல் – துபாயில் இருந்து வந்ததும் கச்சேரி!

அதிமுக முன்னாள் அமைச்சர்கள் சிலரது ஃபைல்கள் மேலிடத்துக்கு சென்றுள்ளதாக கோட்டை வட்டாரங்கள் தெரிவிக்கின்றன

திமுக ஆட்சிப் பொறுப்பேற்றதும் முதலே மாசம் ஒரு மாஜி என்பது போல, அதிமுக முன்னாள் அமைச்சர்கள் மீது அடுத்தடுத்து ரெய்டுகள் பாய்ந்து வருகின்றன. எம்.ஆர்.விஜயபாஸ்கர், எஸ்.பி. வேலுமணி, கே.சி.வீரமணி, சி.விஜயபாஸ்கர் உள்ளிட்ட பலரும் லஞ்ச ஒழிப்புத்துறை சோதனையில் சிக்கி வருகின்றனர். இதில், எஸ்.பி.வேலுமணிக்கு சொந்தமான இடங்களில் மட்டும் இரண்டாவது முறை சோதனை நடத்தப்பட்டுள்ளது.
ஆனாலும், இந்த சோதனைகளை எப்படியாவது அதிமுக முன்னாள் மாஜிக்கள் மோப்பம் பிடித்து விடுகின்றனர். இதனால், கட்சி மாநாட்டுக்கு எப்படி தயாராவார்களோ அதேபோன்று சோதனைகளுக்கும் ரெடியாகவே இருக்கின்றனர். சோதனை நாளன்று எப்படியாவது 200க்கும் மேற்பட்டவர்களாவது குவிக்கப்படுகின்றனர். உள்ளே சோதனைகள் நடைபெறும் அதேவேளையில் வெளியே தடபுடலாக விருந்துகள் அமர்க்களப்படுத்தப்படுகின்றன. கட்சி மாநாட்டுக்கு ஆள் சேர்க்கும் டீம் ஒன்று இதற்கான ஏற்பாடுகளை செய்வதாக தெரிகிறது.இந்த சோதனைகள் முன்னதாகவே அதிமுக முன்னாள் அமைச்சர்களுக்கு தெரிய காரணம் இன்னமும் அவர்களுக்கு விசுவாசமான காக்கிகள் உள்ளே இருப்பதாக கூறப்படுகிறது. அதேசமயம், இந்த சோதனைகள் வெறும் சோதனைகளாக மட்டுமே உள்ளது. இதுவரை யார் மீது கைது நடவடிக்கை பாயவில்லை. இதனால், அதிமுகவினருக்கே சலிப்பு தட்டி விட்டதாக கூறுகிறார்கள்.எனவே, இந்த முறை ரெய்டை தொடர்ந்து கைது நடவடிக்கையை மேற்கொள்ள திமுக மேலிடம் திட்டமிட்டுள்ளதாக தெரிகிறது. இதுகுறித்து கோட்டை வட்டாரத்தில் விசாரிக்கும் போது அடுத்த ரெய்டில் சிக்கும் மாஜிக்கள் தொடர்பாக சில தகவல்களை நம்மிடம் தெரிவித்துள்ளனர் அதன்படி, முன்னாள் தொழில்துறை அமைச்சர் எம்.சி.சம்பத் மீது லஞ்ச ஒழிப்புத்துறை தனது பார்வையை திருப்பியுள்ளது. கடந்த அதிமுக ஆட்சி காலத்தில் உலகத் தொழில் முதலீட்டாளர்கள் மாநாடு மூலம் கிடைக்கப்பெற்ற முதலீடுகளில் சில சிக்கல்கள் இருப்பதாக கூறுகிறார்கள். அதேபோல், சென்னையில் பிரபல கட்டுமான நிறுவனத்துக்கு அரசு இடத்தை குறைவான விலைக்கு வழங்கிய புகாரில், முன்னாள் வருவாய்த்துறை அமைச்சர் ஆர்.பி.உதயக்குமார் தொடர்பான சில தகவல்கள் மேலிடத்துக்கு பாஸ் செய்யப்பட்டுள்ளது. இதனால், அடுத்த ரெய்டு அவர் மீது பாய வாய்ப்புள்ளதாகவும் கூறுகிறார்கள்.

இதுகுறித்து கடந்த ஆண்டு டிசம்பர் மாதம் “அடுத்த ரெய்டு… ஹிட் லிஸ்ட்டில் மூவர்: ஸ்டாலின் எடுத்த ஃபைல்!” என்ற தலைப்பில் சமயம் தமிழ் நாம் ஏற்கனவே செய்தி வெளியிட்டிருந்தோம். அதில், அதிமுக ஆட்சியின் போது, கோயம்பேடு அருகே 10.5 ஏக்கர் புறாம்போக்கு நிலத்தை பாஷ்யம் கன்ஸ்ட்ரக்‌ஷன்ஸ் நிறுவனத்துக்கு சதுர அடி ரூ.12,500க்கு விற்கப்பட்டதில் மோசடி நடைபெற்றுள்ளதாக ஈபிஎஸ், ஓபிஎஸ், ஆர்.பி.உதயகுமார் ஆகியோர் மீது திமுக அமைப்பு செயலாளாரும், எம்.பி.யுமான ஆர்.எஸ்.பாரதி புகார் தொடர்பாக விரிவாக எழுதியிருந்தோம்.

இதுபோன்ற அரசு புறம்போக்கு நிலத்தை விற்கும்போது, அதனை மருத்துவமனை, பஸ்ஸ்டாண்ட், ஐ.டி.பார்க், சந்தை, பல்கலைக்கழகங்கள் உள்ளிட்ட பொதுமக்களுக்கு உபயோகப்படும் வகையில் விற்பனை செய்ய வேண்டும் என்ற விதி மீறப்பட்டுள்ளதால் முறைகேடு நடந்துள்ளதற்கான முகாந்திரம் உள்ளதாக சுட்டிக்காட்டப்பட்டுள்ளது.

“இந்த நிலத்தின் விற்பனைக்காக அரசு தலைமை வழக்கறிஞரிடம் சட்ட ஆலோசனை பெறப்பட்டு, சிறப்பு அனுமதியின் பேரில், அதாவது, ரூ.1575 கோடி முதலீடு ஈட்டப்படும், 7500 பேருக்கு வேலைவாய்ப்பு உருவாகும் என்பதை காரணம் காட்டி சிறப்பு அனுமதியின் பேரில் இந்த நிலம் விற்கப்படுவதாக அரசாணையில் தெரிவிக்கப்பட்டுள்ளது. ஆனால், நிலத்தை வாங்கிய பாஷ்யம் கன்ஸ்ட்ரக்‌ஷன்ஸ் நிறுவனமோ, அந்த இடத்தை ‘crown residence’ என்ற பெயரில் குடியிருப்பு பகுதியாக மாற்றி விற்பனை செய்யவுள்ளது. இதற்கான விளம்பரத்தை அந்நிறுவனம் கொடுத்துள்ளது. எனவே, ரியல் எஸ்டேட் வியாபாரம் செய்யும் ஒரு தனியார் நிறுவனத்தை நலனுக்காக அந்த இடம் விற்கப்பட்டுள்ளது” என்றும் அந்த புகாரில் தெரிவிக்கப்பட்டுள்ளது.

இதுபோன்ற ஒரு திட்டத்துக்கு சிஎம்டிஏ அனுமதி பெற குறைந்த 3 அல்லது 4 மாதங்கள் ஆகும். ஆனால், ஒரு சில நாட்களிலேயே அந்த நிறுவனத்துக்கு அனுமதி அளிக்கப்பட்டுள்ளது. இந்த பின்னணியில் ஈபிஎஸ், ஓபிஎஸ், ஆர்.பி.உதயக்குமார் ஆகியோர் உள்ளதாக கூறப்படுகிறது.

அத்துடன், விற்கப்பட்ட நிலத்தில் அருகே இருக்கும் பகுதிகளின் சந்தை விலையான ரூ.11,500 முதல் ரூ.12,500 வரை என்பதை ஒப்பிட்டு, சதுர அடி ரூ.12,500க்கு விற்கப்பட்டதாக அரசாணையில் தெரிவிக்கப்பட்டுள்ளது. ஆனால் அது பிரதான பகுதியா அல்லது ஒதுக்குப்புற பகுதியா என்பது தெரிவிக்கப்படவில்லை. இருப்பினும், விற்கப்பட்ட நிலம் பிரதான பகுதி. இந்த பகுதியில் சதுர அடி ரூ.25,000க்கு விற்கப்படுகிறது. இதன்மூலம், அரசுக்கு ரூ.500 கோடிக்கும் அதிகமாக இழப்பு ஏற்பட்டுள்ளது. எனவே, இதற்கு பின்னால் மிகப்பெரிய மோசடி சதி நடந்துள்ளது.இப்படி முக்கியத்துவம் வாய்ந்த இந்த மோசடி புகார் தொடர்பான கூடுதல் தகவல்கள் தான் தற்போது மேலிடத்துக்கு பாஸ் செய்யப்பட்டுள்ளது. துபாய் பயணம் முடிந்து முதல்வர் ஸ்டாலின் சென்னை திரும்பியதும், அடுத்தக்கட்ட நடவடிக்கை எடுக்கப்படலாம் என்கின்றனர்.

Related posts:

Leave a Reply

Your email address will not be published. Required fields are marked *